ចំណាយចន្លោះ ២,០០០ដុល្លារ ទៅ ២,៥០០ដុល្លារ សម្រាប់ព្យាបាលអ្នកកើតជំងឺកូវីដ១៩ម្នាក់

Thanks! Share it with your friends!

You disliked this video. Thanks for the feedback!

ចំណាយចន្លោះ ២,០០០ដុល្លារ ទៅ ២,៥០០ដុល្លារ សម្រាប់ព្យាបាលអ្នកកើតជំងឺកូវីដ១៩ម្នាក់ (Video inside)

(ភ្នំពេញ)៖ លោកស្រី យក់ សម្បត្តិ រដ្ឋលេខាធិការក្រសួងសុខាភិបាល បានឱ្យដឹងថា ការព្យាបាលអ្នកកើតជំងឺកូវីដ១៩ម្នាក់ ចំណាយចន្លោះពី ២,០០០ដុល្លារ ទៅ ២,៥០០ដុល្លារអាមេរិក។

ក្នុងសន្និសីទសារព័ត៌មានស្តីពីបច្ចុប្បន្នភាពជំងឺកូវីដ១៩ នៅថ្ងៃទី២០ ខែមេសា ឆ្នាំ២០២០នេះ លោកស្រី យក់ សម្បត្តិ បានឱ្យដឹងថា ថវិកាដែលចំណាយនេះ គឺជាង ១ពាន់ដុល្លារ ចំណាយទៅលើការធ្វើតេស្តរកមេរោគ។ ដោយឡែកជាង១ពាន់ដុល្លារទៀត ចំណាយទៅលើថ្លៃថ្នាំ អាហារហូបចុក ថែទាំ និងការស្នាក់នៅជាដើម។

បើតាមលោកស្រី យក់ សម្បត្តិ ការចំណាយនេះអាស្រ័យទៅលើរយៈពេលនៃការព្យាបាល ពោលបើការព្យាបាលចំណាយពេលយូរការចំណាយក៏ច្រើន ហើយបើការព្យាបាលរយៈពេលខ្លី ការចំណាយក៏តិច។ តម្លៃនេះក៏ប្រែប្រួលទៅតាមការព្យាបាលរវាងមន្ទីរពេទ្យរដ្ឋ និងឯកជនផងដែរ។

លោកស្រី យក់ សម្បត្តិ បានឱ្យដឹងផងដែរថា ការចំណាយនេះមិនទាន់គិតដល់ការឧបត្ថម្ភដល់គ្រូពេទ្យព្យាបាលមួយថ្ងៃ៥០ដុល្លារថែមពីលើប្រាក់បៀវត្សនោះទេ។

មិនទាន់មានការបញ្ជាក់ពីការចំណាយសរុបក្នុងប្រតិបត្តិការប្រយុទ្ធប្រឆាំងជំងឺកូវីដ១៩ ក៏ដូចជាព្យាបាលអ្នកជំងឺនៅឡើយនោះទេ។ ប៉ុន្តែលោកស្រីរដ្ឋលេខាធិការ បានឱ្យដឹងថា ក្រសួងបានចំណាយថវិកាប្រមាណ ៤.៥លានដុល្លារអាមេរិកជាថវិការបស់រដ្ឋ និងថវិកាសប្បុរសជន ៥លានដុល្លារទៀត ទិញសម្ភារនានា សម្រាប់ក្រុមគ្រូពេទ្យប្រើប្រាស់។

សម្តេចតេជោ ហ៊ុន សែន នាយករដ្ឋមន្ត្រីកម្ពុជា ធ្លាប់បានបញ្ជាក់ថា ការព្យាបាលអ្នកជំងឺកូវីដ១៩ទាំងជនបរទេស និងពលរដ្ឋខ្មែរ មិនត្រូវបានគិតថ្លៃនោះទេ។ ការសម្រេចនេះបានបង្ហាញពីការទទួលខុសត្រូវខ្ពស់ និងទឹកចិត្តសប្បុរសធម៌ដ៏ជ្រាលជ្រៅរបស់រាជរដ្ឋាភិបាលកម្ពុជាទៅលើអ្នកជំងឺ ខណៈបណ្តាប្រទេសជាច្រើនសុទ្ធតែបានយកថ្លៃព្យាបាលពីជនបរទេស។

សូមបញ្ជាក់ថា មកដល់ត្រឹមថ្ងៃទី២០ ខែមេសា ឆ្នាំ២០២០ កម្ពុជារកឃើញអ្នកឆ្លងជំងឺកូវីដ១៩ ចំនួន ១២២នាក់ ពលរដ្ឋខ្មែរ ៥១នាក់ ជនបរទេស៧១នាក់។ មកដល់បច្ចុប្បន្នព្យាបាលជា ១០៧នាក់ ហើយកំពុងព្យាបាល ១៥នាក់៕

* ទូរទស្សន៍ព័ត៌មាន Fresh News ផ្សាយគ្របដណ្តប់ទូទាំងប្រទេសតាមរយៈផ្កាយរណប និងខ្សែកាប PPCTV ប៉ុស្តិ៍ 76, DTV ប៉ុស្តិ៍ 19, SkyOne ប៉ុស្តិ៍ 47, One TV ប៉ុស្តិ៍ 18, CCTV ប៉ុស្តិ៍ 37 និងទូរទស្សន៍ខ្សែកាប ២៥រាជធានី-ខេត្ត និងផ្សាយព័ត៌មានថ្មីៗចុងក្រោយតាមប្រព័ន្ធ App, Website, TV Channel, Radio, YouTube, Facebook, English, Chinese, Telegram.