កិច្ចសម្ភាសន៍៖ លោក តុង សុប្រាជ្ញ បង្ហាញពីការប្រែប្រួលរបស់យុវវ័យខ្មែរ ក្នុងថ្ងៃ១៤ កុម្ភៈ

Thanks! Share it with your friends!

You disliked this video. Thanks for the feedback!

កិច្ចសម្ភាសន៍៖ លោក តុង សុប្រាជ្ញ បង្ហាញពីការប្រែប្រួលរបស់យុវវ័យខ្មែរ ក្នុងថ្ងៃ១៤ កុម្ភៈ (Video inside)

(ភ្នំពេញ)៖ លោក តុង សុប្រាជ្ញ ដែលជាអ្នកស្រាវជ្រាវសុខភាពសាធារណៈ បានលើកឡើងថា យុវវ័យខ្មែរនៅពេលបច្ចុប្បន្ន បានមាននិន្នាការប្រែប្រួលទៅរកភាពប្រក្រតីឡើងវិញ ជុំវិញថ្ងៃ១៤កុម្ភៈ ឬទិវានៃក្ដីស្រលាញ់។ លោកថ្លែងបែបនេះនៅក្នុងកិច្ចសម្ភាសន៍ជាមួយអង្គភាពព័ត៌មាន Fresh News ទៅលើរបាយការណ៍របស់លោក ទៅលើឥរិយាបថរបស់យុវវ័យនៅក្នុងថ្ងៃ១៤ កុម្ភៈ។

អ្នកស្រាវជ្រាវរូបនេះបានឲ្យដឹងថា លោកបានចាប់ផ្ដើមសិក្សានិងស្រាវជ្រាវលម្អិតលើឥរិយាបថ របស់យុវវ័យចាប់តាំងពីឆ្នាំ២០០៧។ ជាលទ្ធផលនៃការស្រាវជ្រាវរបស់លោក បានរកឃើញថា យុវវ័យខ្មែរប្រមាណ១២ភាគរយ បានចាត់ទុកថ្ងៃ១៤ កុម្ភៈ ឬអំឡុងពេលនោះហៅម្យ៉ាងទៀតថា «បុណ្យសង្សារ» ជាថ្ងៃទទួល និងប្រគល់ខ្លួនប្រាណឲ្យទៅសង្សាររបស់ខ្លួន ដើម្បីបញ្ជាក់ពីក្ដីស្រលាញ់។

ការយល់ច្រឡំរបស់គូស្នេហ៍វ័យក្មេង ប្រមាណ១០ឆ្នាំមុននេះ ត្រូវបានអ្នកវិភាគបញ្ហាសង្គមល្បីឈ្មោះរូបនេះពន្យល់ឲ្យដឹងថា គឺបណ្ដាលមកពីការយល់ខុសអំពីប្រវត្តិ និងអត្ថន័យ នៃទិវានៃក្ដីស្រលាញ់ ខណៈដែលយុវវ័យនៅអំឡុងពេលនេះ ទើបទទួលបានដឹងពីទិវានេះថ្មីៗ។ ការភ័ន្តច្រឡំរបស់យុវវ័យនៅពេលនោះ បានបង្កឲ្យមានវិបត្តិ និងវិបដិសារីក្នុងជីវិត ជាពិសេសនារី ដែលធ្វើឲ្យមានជំងឺបាក់ទឹកចិត្ត និងបាត់បង់ឱកាសក្នុងការសិក្សា ជាពិសេស ការមានផ្ទៃពោះដោយចៃដន្យ និងការឆ្លងមេរោគអេដស៍ជាដើម។

យ៉ាងណាមិញលោក តុង សុប្រាជ្ញ ដែលបានស្រាវជ្រាវរយៈពេល៥ឆ្នាំម្ដង ដោយការចំណាយថវិកាផ្ទាល់ខ្លួននោះបានបន្ថែមទៀតថា មកទល់ឆ្នាំ២០១៩ និង២០២០នេះ ការស្រាវជ្រាវរបស់លោក បានរកឃើញថា យុវវ័យបច្ចុប្បន្ន មាននិន្នាការប្រែប្រួលលើថ្ងៃ១៤ កុម្ភៈ ដោយប្ដូរពីថ្ងៃ«បុណ្យសង្សារ» ទៅប្រើពាក្យថា«ទិវានៃក្ដីស្រលាញ់»។ មិនតែប៉ុណ្ណោះចំពោះភាគរយនៃការឆ្លៀតឱកាសនាំយកសង្សារទៅរួមភេទក្នុងឱកាសនោះ ក៏មានការថយចុះផងដែរ។ ពោលគឺធ្លាក់ចុះមកត្រឹម៥ភាគរយតែប៉ុណ្ណោះ។

ការធ្លាក់ចុះចំនួន៧ភាគរយនេះត្រូវបានលោក តុង សុប្រាជ្ញ មើលឃើញថា ជាសញ្ញាណវិជ្ជមានក្នុងការវិវត្តទៅរកភាពប្រក្រតីឡើងវិញរបស់យុវវ័យខ្មែរ ជុំវិញការយល់ឃើញខុសលើថ្ងៃ១៤ កុម្ភៈ។ ភាពល្អប្រសើរឡើងវិញនេះ ត្រូវបានអ្នកស្រាវជ្រាវខាងលើ ពន្យល់បន្ថែមថា ដោយសារតែស្ថាប័នក្រសួងពាក់ព័ន្ធដូចជាក្រសួងអប់រំ ក្រសួងវប្បធម៌ សារព័ត៌មាន សាលារៀន និងអាណាព្យាបាលសិស្ស បានផ្សព្វផ្សាយអប់រំ លើការភ័ន្តច្រឡំ និងពន្យល់អំពីវិធីសាស្រ្ត និងការពារខ្លួនដល់កូនៗ ក៏ដូចជាយុវវ័យឲ្យបានស្គាល់ច្បាស់ពិវប្បធម៌នៃទិវានេះ។ ដែលកន្លងមកមិនមែនតែប្រទេសកម្ពុជាប៉ុណ្ណោះទេដែលបានជួបបញ្ហានេះ សូម្បីតែប្រទេសថៃ បានជួបបញ្ហានេះ និងធ្ងន់ធ្ងរជាងកម្ពុជាមុនកម្ពុជាទៅទៀត។

កត្តានេះហើយបានជាលោក តុង សុប្រាជ្ញ បានយល់ឃើញជាវិជ្ជមានថា យុវវ័យកម្ពុជាអាចវិវត្តទៅរកភាពប្រក្រតីឡើងវិញលើទិវានៃក្ដីស្រលាញ់ ហើយបានប្ដូរមកធ្វើរឿងល្អៗដើម្បីជួយសង្គមវិញ។ តួរយ៉ាងដូចជាការជ្រើសរើសថ្ងៃ១៤ កុម្ភៈ ជាក្ដីចូលរួមបរិច្ចាគឈាម និងជាថ្ងៃផ្ដល់នូវក្ដីស្រលាញ់ ជាពិសេសដល់ឱពុកម្ដាយ បងប្អូន ឬប្ដីប្រពន្ធជាដើម៕

* ទូរទស្សន៍ព័ត៌មាន Fresh News ផ្សាយព័ត៌មានថ្មីៗរៀងរាល់មួយម៉ោងម្តង ពេញ២៤ម៉ោង និងទូទាំង២៥រាជធានី-ខេត្តក្រុង ! ផ្សាយតាមរយៈស្ថានីយ៍ទូរទស្សន៍ខ្សែកាបទូទាំងប្រទេស និងផ្សាយតាមរយៈប្រព័ន្ធ Sky One និង Smart TV, App, Website, Radio, Facebook និង Youtube

http://www.freshnewsasia.tv